Textus
PRIVILEGIUM ALEXANDRI PAPÆ III. per quod confirmat Prioratum sancti Viventii de Vergiaco cum omnibus suis pertinentiis sub obedientia Abbatis Clun. | |
ALEXANDER Episcopus servus servorum Dei, dilectis filiis
Joannis Priori Ecclesiæ sanctæ Mariæ de Vergiaco, ejusque fratribus
tam præsentibus quam futuris Regularem vitam professis in perpetuum.
Susceptæ administrationis officium monet nos impensius & hortatur
loca religiosa speciali charitate diligere, & ab injuriis
malignantium protectionis Apostolicæ clypeo præmunire. Eapropter
dilecti in Christo filii vestris justis postulationibus clementer
annuimus, & præfatam Ecclesiam, in qua divino mancipati estis
obsequio, sub beati Petri & nostra protectione suscipimus, &
præsentis scripti privilegio communimus; in primis siquidem statuentes
ut ordo Monasticus, qui secundum Deum & sancti Benedicti regulam in
Monasterio vestro statutus esse dignoscitur, perpetuis ibidem
temporibus inviolabiliter observetur. Prætereà quascunque
possessiones, quæcumque bona eadem Ecclesia in præsentiarum justè &
canonicè possidet, aut in futurum concessione Pontificum, largitione
Regum vel Principum, oblatione fidelium, seu aliis justis modis
præstante Domino poterit adipisci, firma vobis vestrisque
successoribus & illibata permaneant, in quibus hæc propriis duximus
exprimenda vocabulis. Ecclesiam sanctæ Mariæ & sancti Viventii de
Vergiaco cum Villa, Ecclesiam sancti Saturnini in eadem villa, cum
appendiciis suis, Ecclesiam sancti Victoris de Marrineiaco, cum
appendiciis suis, & Capellam ejusdem Castri, cum appendiciis suis,
Ecclesiam sancti Joannis de Boes cum appendiciis suis, Ecclesiam &
Villam sancti Albini de Artenant cum appendiciis suis; Ecclesiam &
Villam sancti Martini de Boons cum appendiciis suis; Ecclesiam &
Villam sanctæ Mariæ de Flageiaco cum appendiciis suis; Ecclesiam
sancti Joannis de Flaveuerat cum appendicis suis; Ecclesiam sancti
Martini de Genleiaco, cum appendiciis suis, Ecclesiam sanctæ Mariæ de
Cultis juxtà Malleiacum cum appendiciis suis, Ecclesiam S. Mariæ &
Villam de Ladona, & Prioratum cum omnibus appendiciis, sicut in
privilegio felicis memoriæ prædecessoris nostri Innocentii Papæ
continetur; Ecclesiam & Villam sancti Viventii Prioratum cum omnibus
appendiciis suis; Ecclesiam
[ 75/2 ]
& Villam quæ dicitur Ausona cum omnibus
appendiciis suis; Ecclesiam sanctæ Mariæ in eadem Villa cum
appendiciis suis; Ecclesiam sancti Stephani de Abergement cum eadem
Villa & omnibus aliis appendiciis suis; Ecclesiam & Villam sancti
Albini cum omnibus appendiciis suis; Ecclesiam de Jambent cum omnibus
appendiciis suis, Ecclesiam de Sampens cum appendiciis suis; Ecclesiam
sancti Petri de Charreiaco cum Capella de Veleiaco cum omnibus
appendiciis suis, Ecclesiam sancti Andreæ de Brent cum appendiciis
suis, Ecclesiam, Villam, Prioratum sanctæ Mariæ & sancti Viventii de
Borsi cum appendiciis suis, Ecclesiam sancti Patricii de Novavilla cum
appendiciis suis; Ecclesiam sancti Gengulphi de Mesler cum appendiciis
suis; Ecclesiam, Villam, Prioratum sancti Clementis de Maseries cum
appendiciis suis, Ecclesiam sancti Viventii de Saler cum appendiciis
suis, Minagium de Ausona de dono Comitis Stephani, & quadraginta
solidos in redditibus ejusdem villæ, quos de portione & donatione
ejusdem Comitis possidetis; ex dono Guidono de Chauls molendinum de
Serrea cum Foresta ad eum pertinente & cæteris appendiciis suis.
Præterea pactum quod inter Guichardum Priorem quondam Monasterij
vestri, & nobilem virum Willermum Comitem Matisconensem & filios
ejus, super villa ædificanda, quæ Veson vocatur, de libera voluntate
pretium intercessit ratum habemus, ipsumque authoritate Apostolica
confirmamus. Sanè novalium vestrorum, quæ propriis manibus aut
sumptibus colitis, sive de nutrimentis vestrorum animalium, nullus à
vobis decimas exigere vel extorquere præsumat. In Paroch. autem
Ecclesiis vestris vacantibus liceat vobis Sacerdotes eligere &
Episcopo præsentare, quibus, si idonei inventi fuerint, Episcopus
animarum curam committat; & de plebis quidem cura Episcopo, nobis
verò de temporalibus debeant respondere; sepulturam quoque ipsius loci
liberam esse decernimus, ut eorum devotioni & extremæ voluntati, qui
se illic sepeliri deliberaverint, nisi fortè excommunicati vel
interdicti sint, nullus obsistat, salva tamen justitia illarum
Ecclesiarum, à quibus mortuorum corpora assumuntur. Paci etiam &
tranquillitati vestræ paterna sollicitudine providere volentes
authoritate Apostolica prohibemus ne infra clausuram loci vestri, seu
grangiarum vestrarum ullus violentiam, vel rapinam, seu furtum facere,
vel homines capere aut interficere audeat. Decernimus ergo ut nulli
omnino hominum liceat præfatum monasterium temerè perturbare, aut ejus
possessiones auferre vel ablatas retinere, minuere, aut aliquibus
vexationibus fatigare; sed omnia integra conserventur eorum, pro
quorum gubernatione ac sustentatione concessa sunt, usibus omnimodis
profutura, salva sedis Apostolicæ authoritate, Abbatis Cluniacensis
obedientia & reverentia, atque in præscriptis Ecclesiis Dicesani
Episcopi Canonica justitia. Si qua igitur in futurum Ecclesiastica
sæcularisve persona hanc nostræ constitutionis paginam sciens contra
eam temerè venire, tentaverit secundò, tertióve commonita, nisi reatum
suum digna satisfactione correxerit, potestatis honorisque sui
dignitate careat, reamque se divino judicio existere de perpetrata
iniquitate cognoscat, à sacratissimo corpore ac sanguine Dei & Domini
Redemptoris nostri Jesu Christi aliena fiat, atque in extremo examine
districtæ ultioni subjaceat; cunctis autem eidem loco sua jura
servantibus sit pax Domini nostri Iesu Christi, quatenus & hic
fructum bonæ actionis percipiant, & apud districtum judicem præmia
æternæ vitæ inveniant. Amen.
Ego Alexander Catholicæ Ecclesiæ Episcopus. Ego Imbaldus Hostiensis Episcopus. Ego Ioannes Presbyter Cardinalis sanctorum Ioannis & Pa. tituli Pammachii. [ 76/1 ] Ego Ioannes Presb. Card. tit. sanctæ Anastasiæ. Ego Ioannes Presbyter Cardinalis tit. S. Marci. Ego Petrus Presbyter Card. tit. sanctæ Susannæ. Ego Vivianus Presbyter Cardinalis tit. S. Stephani in Celio monte. Ego Cencius Presbyter Card. tit. sanctæ Cæciliæ. Ego Iacobus Diac. Card. S. Mariæ in Cosmedin. Ego Ardicio Diaconus Card. S. Theodori. Ego Rainerius Diaconus Cardinalis S. Georgii ad velum aureum. Ego Ioannes Diaconus Cardinalis sancti Angeli. Ego Rainerius S. Adriani Diaconus Cardinalis. Ego Matthæus Diaconus Card. sanctæ Mariæ novæ. Ego Bernardus Diaconus Cardinalis sancti Nicolai in carcere Tulliano. Datum Tusculani, per manum Arberti S. R. E. Presbyteri Cardinalis Cancellarii, octavo Idus Decembris, Indictione XI. Incarnationis Dominicæ anno millesimo centesimo septuagesimo octavo, Pontificatus verò Domni Alexandri Papæ III. anno vicesimo. |
Bullarium Cluniacense | Index paginarum | Index chronologicus Privilegiorum | Quaestio | Explicatio |
E-Mail an das Projekt "Cluny" im Institut für Frühmittelalterforschung
KONTAKT
Institut für Frühmittelalterforschung
|
![]() | |
© 2010 Institut für Frühmittelalterforschung |