Notum sit omnibus tam presentibus quam supervenientibus, quod ego peccator Landricus et frater meus germanus et coheres Bernardus, patrium fundum patriumque larem quem ab nostris antecessoribus usque modo sine omni contradictione tenebamus in loco qui dicitur Meletum situmque in pago Matisconense, summa devotione donamus Domino nostro Jesu Christo et sanctæ Marię, semper Virgini, matri ejusdem Domini, et beatis apostolis Petro et Paulo, necnon et omnibus sanctis ejus, ad locum Cluniacum, ubi domnus Hugo abbas magis prodesse quam preesse videtur. Sic quoque donamus ut tenebamus nos omni hereditario jure, quemadmodum determinavimus, cultis et incultis, reditibus et exitibus, cunctisque suis appendiciis, ut prefati sumus. Et hoc pro remedio animarum nostrarum parentumque nostrorum, scilicet avi nostri Jozceranni, patris et matris nostrę, cunctorumque parentum nostrorum, de quorum germine huc usque processimus ac deinceps in generationibus nostris processuri crescendo et multiplicando in etatibus nostris fuerimus, et pro cunctis nostris erratibus, in quibus nos lapsos esse profitendo cognoscimus. Subicimus etiam huic predio terras quasdam sibi adjacentes; et quandiu dies et horę labant, et se iterato reciprocant, fratribus illic Domino famulantibus tenendas, donamus; et illis de omnibus et silvis et nemoribus nostris liberum arbitrium succidendi recisum, ut libet, necnon porcis eorum ut nostris in siliquis cibum; similiter pascua bestiis eorum concedimus in pascuis nostris, sicut et bestiis nostris; adicimus vero in omnibus aquis nostris aquarumque decursibus piscationis licentiam. Super hæc omnia unum de servientibus nostris, nomine Johannem, arte piscatoria notum, eisdem fratribus in servicium manumittimus. Facta est autem hęc carta anno Dominicę incarnationis millesimo octuagesimo VII^o, idibus octonis aprilis, sceptra regente Phylippo nobili Francorum rege, in sepedicto predio quod dicitur Meletum, in presentia domni Hugonis, religiosi Cluniacensis cœnobii patris.