Guido, Dei gratia sanctę Belvacensis ęcclesię episcopus, omnibus sanctę matris ęcclesię filiis, tam futuris quam presentibus, post laboriosam seculi hujus peregrinationem, quietam in cęlestibus mansionibus conversationem. Quia omnipotens Deus fideles suos inter hujus peregrinationis erumnas ad vitę patriam festinantes non solum spiritualibus sed etiam corporalibus bonis, ne in via deficiant, dignatur sustentare; ideo ad noticiam cunctorum fidelium volumus pervenire, qualiter villa quę dicitur Escelens, cum ęcclesia et altari, de manu comitis Hugonis de Domno Martino exierit, et ad dominium monachorum Cluniacensium pervenerit, ut quod Dei pietas nostris temporibus per manum nostram dignata est confirmare, nulla posterorum temeritas deinceps audeat infirmare. Hugo, comes de Domno Martino, pręfatę villę ęcclesiam cum altari quem tenebat, quia in nostro episcopatu sita erat, nobis reddidit; quam postea cum altari similiter beato Petro Cluniacensi et ejusdem monasterii monachis dominis videlicet et fratribus nostris donavimus, et coram conventu clericorum nostrorum deinceps semper habendam concessimus. Postea vero idem comes Hugo, divino instinctu, prefatam villam et omnia ad eam pertinentia, terras scilicet arabiles et silvas, prata et vineas, servos et ancillas, amnem quoque subter currentem cum transitu, predictę Cluniacensium ęcclesię donavit, exceptis militum beneficiis, et deinceps possidenda concessit, annuente Phylippo rege et Hugone, regis fratre de Crispeio, et ejus uxore Adela. Si vero aliquis militum prefatę villę beneficia tenentium beato Petro suum beneficium aliquando vellet donare, omnino id sibi facere liceret absque ulla requisitione pecunię, quam idem comes Hugo vel aliquis successorum ejus exigeret. Ut igitur hęc inconvulsa permanerent, cum nostris abbatibus et clericorum ęcclesię nostrę venerabili conventu, necnon et presbiteris totius nostri episcopatus, sicut sunt prescripta, confirmavimus; ex parte etiam Dei omnipotentis, beatorum quoque apostolorum Petri et Pauli auctoritate et nostra, omnes qui contraire vel contradicere presumerent, excommunicavimus. Rohaidis, uxor Hugonis de Domno Martino, et filius ejus Petrus, et filię ejus Basilia, Adela, Eustachia presentes fuerunt, et prefatum donum laudaverunt et confirmaverunt. Phylippus rex laudavit et confirmando subscripsit, anno regni sui XX^mo. Affuerunt Adans dapifer regis, Herveus pincerna, Gervasius stabularius, Hugo de Crispeio subscripsit. Affuerunt Petrus, filius Tetbaldi, Adans frater ejus, Lambertus, frater ejus, Gualcerius, Tetbaldus, Drogo dapifer. Testes qui affuerunt cum Hugone de Domno Martino, Ilgerius, Rotbertus filius Anseis, Gualterus filius Martini. † Subscriptio Adelę, uxoris Hugonis de Crispeio. Actum tempore domni Hugonis, abbatis Cluniacensis, anno ab incarnatione Domini millesimo LXXXI, indictione IIII^a.