Salvator noster fideles suos in Euvangelio ammonet, dicens: «Facite vobis amicos de Mamona iniquitatis, ut cum defeceritis recipiant vos in æterna tabernacula.» Hujusmodi ammonitioni obaudientes, ego Hugo, vicecomes Pruliensis et mater mea domna Adalaidis, et meus consanguineus Petrus, donamus Domino Deo et sanctis ejus apostolis Petro et Paulo, ad locum Cluniacum, in usum et servitium Dei servorum ibi degentium sub cura et regimine domni Hugonis, reverentissimi abbatis, quatuor æcclesias cum omnibus ad eas pertinentibus in pago Pruliensi sitas, et duo molendina. Una æcclesia est in villa quę dicitur Alairacus super ripam fluminis quod vocatur Lertius et alia est in villa quę dicitur Casales; et tercia est in villa quę vocatur Pressiacus, et quarta in villa quę vocatur Veziacus. Has, ut predictum est, donamus potestativa manu absque omnium hominum contradictione, eo tenore ut Cluniacensis congregatio perpetuo jure eas habeat et possideat pro salute animarum nostrarum et parentum nostrorum: excepta quinta parte in æcclesia quę est Alairaco; et in æcclesia quę est Veziaco tercia parte excepta, quas partes non nos sed alii consanguinei habuerunt. Si quis autem hanc donationem nostram ullo modo infringere temptaverit, hujus affectum ne perveniat ad effectum, validissima manus Dei omnipotentis prohibeat, et ipsius odium et omnium ejus incurrat. Et preterea condempnamus eum ad fiscum regis vel comitis Vasconię, ut sit debitor decem librarum auri. Facta est autem hæc carta in villa quę dicitur Mons Calvus, anno Dominicę incarnationis millesimo sexagesimo IIII, regni autem Phylippi regis Francorum IIII^to, ordinationis quoque domni Wilelmi Aginnensis æcclesiæ episcopi IIII^o, XVI kalendas decembris, indictione II; presentibus domno Hugone Cluniacensi abbate, cujus et supra meminimus, et domno Duramno, Tolosanę sedis episcopo, necnon viris nobilibus Arnaldo, Wilelmo, Pontione, Petro.