Omnibus intra sacrosanctam ecclesiam consistentibus luce clarius pateat, quod ego Silvius et filius meus Wigo, reminiscentes peccata que per incuriam humana committit miseria, ex ipsis possessionibus que nobis pius Dominus contulit facimus eumdem largitorem pium et propitium heredem, ut de cujus munere talia accepimus, ipso largiente, veniam peccatorum nostrorum percipere mereamur. Donamus itaque et concedimus Domino Deo et sanctis apostolis ejus Petro et Paulo et ad locum Cluniacum, ubi prodest magis quam preest domnus Hugo abba, aliquid de propria nostra hereditate, que est sita in episcopatu Clarmon[ten]si et in regione que dicit[ur] Limagna. Est autem hoc donum æcclesia celebris et renominata que vocatur de Losdessa, cum vico sive burgo sibi adherente, et cum omnibus mansionibus que ibi habentur, et omnibus appenditiis que ad ipsam æcclesiam pertinent, decimam videlicet cunctarum rerum, vel fructuum que ipsa æcclesia actenus habuit, absque ulla retentione donamus; campos ætiam cultos et incultos, vineas, agros, prata, pascua, exitus et introitus quarumque viarum, flaccentia, irrigua, et arentia, et, ut breviter concludamus, quicquid illud est quod ego Silvius tenui et mater mea Aiglina et filio meo Vigoni reliqui, ut ipse vice mea, quem sors mortis preripuit, hoc donum faceret jam dicto loco Cluniaco et habitatoribus ejus, ut deinceps habeant, teneant ac possideant jure hereditario, absque alicujus persone contradictione. Si denique infidelis anima hoc donum, quod nos singulariter liberum et ab omni prorsus calumnia nitidum predicto loco concedimus, calumpniare attentaverit, ire Dei omnipotentis et sanctorum ejus subjaceat et cum Datan et Abiron vivus demergat[ur] in tartareus cahos, nisi congrua ei subvenerit emendatio; hæc autem carta cum auctoritate propria firma et stabilis et inconvulsa permaneat. S. Silvii et filii ejus Wigonis, qui hoc donum fecerunt et hanc cartam firmaverunt et laudaverunt. S. Wilelmi. S. Pontii. Actum publice Cluniaco, infra septa monasterii, II kal. aprilis anno millesimo LXIII^o ab incarnatione Domini, regnante Philippo rege anno regni ejus IIII^to. Gunbertus sacerdos ad vicem cancellarii scripsit.