Hęc est notitia vuerpitionis quam fecit Agnus, filius Arleii Calvi, de querela quam habebat pro manso quem pater ejus tenuit. Werpivit enim idem Agnus requisitionem ejusdem mansi in presentia prioris G., eo pacto ut aut XX solidos currentis monetę daret, aut si expectare mallet, bestiam sibi quantivis pretii prestaret, et ipse de suo alodo post discessum suum dedit ad Cluniacum unum mansum bonum, et partem terrę quam tenet de Sancto Petro post mortem suam cum eodem manso remisit habendam; ita ut vel si habitum monachi expeteret susciperetur, vel in seculo finiret, Cluniaco sepeliretur, uxori quoque suę sepultura daretur. Similiter ceteris calumpniis remissis, in bona pace et concordia remansit nobiscum, excepto capite census, si quid erat sibi requirendum.