Redemptor humani generis humanę casum conditionis presciens, nostræ consulens erectioni, diversa ac salutifera dignatus est prebere medicamina, quę nostra curare valeant vulnera letifera. Inter quę unum maximum ac precipuum omnibus anteponens, dixit: «Date elemosinam et ecce omnia munda sunt vobis»; et alibi: «Thesaurizate vobis thesauros in celo, quo fur non appropriat», et cetera. Unde ego Raimodis, uxor Guidonis de la Rocha, cupiens dominicis obsecundare mandatis, ob animę meę redemptionem, dono Deo et sanctis ejus apostolis Petro, apostolorum principi, et coapostolo ejus Paulo, gentium doctori, Cluniensique loco eorum in honore fundato et consecrato, cui domnus Hugo abbas magis prodesse quam videtur presse, et fratribus ibidem Deo servientibus, presentibus et futuris, unum mansum in villa vocabulo Montelorio, et omnia quę ad eundem mansum pertinent, omnemque censum quem mihi per unumquemque reddebat annum, totum ab integro dono, laudo et confirmo loco prenominato, laudante viro meo Widone, et filiis meis Ademaro et Widone, et fratribus meis Girardo et Artaldo. Si quis autem hanc nostram donationem temerario auso diaboli fascibus inflamatus, infringere temptaverit (quod absit!), nisi ad satisfactionem venerit, sit anathema maranatha. S. Raimodis, quę donum hoc fecit et firmavit et firmandum testibus tradidit. S. Widonis, viri sui. S. Ademari et Widonis, filiorum ejus. S. Girardi et Artaldi, fratrum ejus.