Omnibus tam futuris quam presentibus per hanc recordationis cartam notum esse volumus, quod Rotdulfus et Petrus, filii Warini de Bellaura, venientes coram donno Hugone abbate ceterisque fratribus in capitulum Cluniense, hanc conventionem fecerunt de terra illa quam pater eorum adquisierat de Sancto Petro, ut medietatem fructus ipsius terrę deinceps jam omni anno eidem Beato Petro ac supradictis fratribus consuetudinarie redderent, hoc videlicet nihilque aliud interposito, ut in morte si Cluniaco delati fuerint, a fratribus pro caritate recognoscantur et sepeliantur. Conventum est etiam ut post mortem ipsorum duorum, Rotdulfi videlicet et Petri, seu Hugonis, filii ejusdem Rotdulfi, suprascripta terra de qua loquimur, absque alicujus querimonia, Sancto Petro ex integro remaneat; et nullus eam quasi hereditario jure de eorum genere ulterius requirere debeat. Interim autem omni anno pro censu debent unum porcum de duobus solidis et cetera omnia quę pro uno manducare debentur equaliter, sicut pro illo alio manducare debent pro alia vinea.